Стотици илјади Романци на протест против корупцијата
2 февруари 2017
Меѓу 200 и 300 илјади демонстранти, според медиумски проценки, излегоа на улиците во повеќе романски градови извикувајќи „Крадци“ и „Оставки!“, еден ден откако владата со декрет ги смени законите. Во главниот град Букурешт, дел од демонстрантите се судрија со полицијата фрлајќи камења, шишиња и пиротехника, на што беше одговорено со солзавец. Повеќе полицајци и демонстранти биле полесно повредени.
Масовни протести се одржаа и во Темишвар, лулката на револуцијата од 1989 година.
Во владиниот декрет донесен во вторникот, беа декриминализирани некои корупциски прекршоци, а злоупотребата на службената должност стана казнива со затвор само во случај на финансиска загуба поголема од 44 илјади евра.
Новата романска влада предводена од Социјалдемократите е на власт само неколку недели, по победата на изборите на 11 декември, и тоа помалку од една година откако беа урнати од власт, исто така по масовни протести.
Владата официјално досега не се изјасни за измените. Само министерот за правда Флорин Јордаче во средата кусо прокоментира дека во декретот нема „ништо тајно, нелегално или неморално“.
Критичарите велат дека најголем профитер од измените ќе биде токму лидерот на социјалдемократите, Ливиу Драгнеа, кому му се суди за злоупотреба на должноста, како и на неколку други левичарски политичари. На Драгнеа веќе му е забрането вршење јавна функција поради двегодишната условна затворска казна за изборна измама.
Уште една владина иницијатива, која премиерот Сорин Гриндеану планира да ја поднесе до парламентот, предвидува ослободување од затвор на околу 2.500 луѓе кои се осудени на помалку од пет години за ненасилни прекршоци. Критичарите се сомневаат дека целта е да бидат ослободени повеќе поранешните функционери и политичари кои се осудени за корупција.
Европската Комисија минатата недела ја пофали Романија за анти-корупциските напори, но вчера стигна сосема поинаков став од првите луѓе, Жан Клод Јункер и Франс Тимерманс кои изразија „длабока загриженост“ поради последните законски измени.
Претседателот Клаус Јоханис, кој беше избран во 2014 година на анти-корупциска платформа, го нарече декретот „скандалозен“ и најави консултации со Уставниот суд.