Сите одговорни за кризата да одговараат пред законот
4 март 2016
САД даваат поддршка за создавање услови за организирање слободни и фер избори на 5 јуни, соопшти денеска заменик помошникот државен секретар на САД за Европа и Евроазија, Брајан Хојт Ји во Скопје. Истовремено, Ји порача и дека Вашингтон очекува сите одговорни за политичката криза да одговараат за своите постапки, давајќи поддршка за работата на Специјалното јавно обвинителство.
Во рамките на дводневната посета на Скопје, Ји се сретна со претседателот на државата, Ѓорге Иванов, претставници на политичките партии и правосудството, како и со техничкиот премиер Емил Димитрев.
Ји верува дека до 5 јуни мора да се создадат услови за фер избори и притоа го поздрави почетокот на прочистувањето на Избирачкиот список.
„Одблиску ги набљудуваме медиумските реформи и улогата на медиумите во обезбедувањето на рамноправен терен за време на предизборието. Исто така одблиску ја набљудуваме целокупната атмосфера во која гласачите би имале можност да гласаат слободно“, рече Ји.
Од особена важност за САД, според дипломатот, е работата на Специјалното обвинителство со кое треба да соработуваат институциите и политичките партии. Тоа Ји го побарал на средбите со своите соговорници во Скопје, потенцирајќи дека имплементацијата на Договорот од Пржино е значајно за иднината на земјата.
„На сите состаноци ја нагласивме важноста од поддршката на Специјалното јавно обвинителство, да се поддржи важноста од владеењето на правото и да се осигура дека сите претставници одговорни за кризата ќе бидат повикани на одговорност за своите дела во согласност со владеењето на правото“, рече Ји. Во случај на опструкции и прекршувања на поддршката кон СЈО, САД „ќе дадат сугестии како тие да се надминат“, рече дипломатот.
За инцидентите поради поставувањето на верски симболи во населбите Чаир и Бутел, Ји очекува реакција од политичките и верските лидери.
„Земјата треба во целина да се движи кој една заедничка цел на подобра и посветла иднина, интегрирана во Европа, подобра средина за економски развој и можности за младите. Ваквите инциденти се случуваат во многу земји, вклучително и во мојата, но важно е како политичките и верските лидери ќе реагираат на нив, рече Ји.