САД ќе задржат дел од војската во Авганистан

Американскиот претседател Барак Обама потврди дека американските војници во извесен обем ќе останат во Авганистан до крајот на 2016 година, меѓутоа предупреди дека тој распоред ќе зависи од судбината на Билатералниот договор за безбедноста, кој треба да го потпише новиот авганистански претседател.

Во текот на говорот во Белата куќа, американскиот претседател Барак Обама изјави дека одлучил да задржи 9.800 американски војници во Авганистан по завршувањето на борбената мисија на меѓународните сили предводени од НАТО до крајот на 2014 година и пред целосното повлекување две години подоцна, или пред завршувањето на неговиот втор претседателски мандат.

„Американската воена мисија ќе заврши до крајот на оваа година. Од почетокот на наредната Авганистанците целосно ќе бидат одговорни за безбедноста на својата земја. Американските војски ќе ја имаат улогата на советници, повеќе нема да патролираат низ градовите, планините и долините на Авганистан, тоа е задача на авганистанскиот народ“, изјави ОБама.

Според него, американската армија ќе и помогне на авганистанската да ја запре активноста на Ал Каеда. До крајот на 2015 година американскиот контингент ќе биде концентриран на главниот град Кабул и блиската воздухопловна база Баграм, а до крајот на 2016 година само на војниците кои ќе ја обезбедуваат сигурноста на амбасадата на САД во Кабул, прецизира Обама.

Прашањето на потпишувањето на Билатералниот договор за безбедноста предизвика тензии меѓу Вашингтон и Кабул, откако авганистанскиот претседател на заминување Хамид Карзаи одби да го прифати договорот. Одбивањето на Карзаи да го потпише договорот, со кој се регулира и судската надлежност во врска со активностите на американските војници, го предизвика гневот на САД кои се заканија со ткн „опција нула“, односно не задржување на ниту една единица во Авганистан по 2014 година.