Рено се повлекува од Русија, ќе го наследи Москвич

Рено ќе го продаде мнозинскиот удел во автомобилската компанија Автоваз на руски научен институт за симболична цена од една рубља, со опција да го купи назад во период од шест години. Русија е под остри економски санкции од западните држави кои особено тешко го погодуваат банкарскиот и производствениот сектор. 

Градоначалникот на Москва, Сергеј Собјанин соопшти дека за да се сочуваат илјадници работни места во компанијата, фабриката на Рено ќе се користи за повторно производство на популарните автомобили од советската ера - Москвич. 

Според податоците од минатата година, вредноста на имотот на Рено во Русија се проценувал на околу 2,2 милијарди евра. 

„Денес донесовме тешка, но неопходна одлука, и правиме одговорен избор кон нашите 45 илјади вработени во Русија“, изјави генералниот директор на Рено, Лука де Мео. Со ваквиот чекор, додаде тој, се задржува можноста компанијата да се врати во иднина во поинаков контекст. 

Производството на Москвич престана пред околу 20 години. Но градоначалникот Собјанин вели дека Москва соработува со производителот на камиони Камаз и руското Министерство за трговија за да се пронајде доволно производство на неопходните делови во земјата. Очекувањата се производството на Москвич да започне во текот на оваа година. 

Рено најави во март дека ќе го запре производството во фабриката во Москва поради растечкиот притисок врз компанијата од почетокот на руската воена агресија врз Украина. Француската држава има 15 проценти удел во автопроизводителот. 

Повеќе од 400 компании се повлекоа од Русија од почетокот на агресијата врз Украина на 24 февруари, оставајќи имот вреден милијарди евра.