Рекордни горештини: 40 степени во Германија

Сабине Кригер деновиве е на цена. Таа работи за Германската метеоролошка служба со седиште во Офенбах, чија цел е да предупредува од опасности поврзани со временските услови и да ја следи климата во Германија, да ја документира и да ги евалуира забележаните промени. За ДВ Кригер вели дека струењето „Ула“ ќе се погрижи и следните денови за високи температури во Германија.

„Сонцето може речиси непречено да сјае, а ни доаѓа и топол воздух од Африка. Температурата може да достигне и до 39 степени, на некои места и 40.“ 

Утрешниот ден ќе биде веројатно најтоплиот во годината. Па така и шансите се големи во следните неколку дена да биде пробиен рекордот од 38,2 степени измерени во јуни во Франкфурт во 1947 година. Германската метеоролошка служба за 11 од вкупно 18 покраини издаде предупредувања заради жешкиот бран. Службата и преку социјалните профили предупредува од подолго престојување на отворено и информира дека УВ-зрачењето „не е за потценување ниту во сенка”, а предупредува и да се внимава на соодветна облека „како кошула, долги панталони, очила и шапки".

Загрозени лица од одредени професии

Повеќето луѓе може да ги избегнат горештините во затемнети и климатизирани простории, но припадниците на одредени професии се изложени на топлината. Пред сѐ, се работи за градежни работници кои буквално се „пржат“ на сонцето. Кога, на пример, се поставува нов асфалт температурата може да достигне и до 80 степени Целзиусови. Покрај физичкиот напор, работата ја отежнува и прашината, нечистотијата и тешката механизација.

За да ја избегнат законската регулатива за ослободување од работа во услови на жега многу газди од градежната индустрија почетокот на работата го повлекуваат во раните утрински часови. Рано почнуваат и помошниците за жетва, како и земјоделците. Работата на нива и на ниски температури е напорна. Во летните месеци работата е мачење, оти сенка попусто ќе барате на нива со овошни и зеленчукови насади. Но, тоа не менува ништо на фактот дека јагодите, тиквичките, карфиолот и морковите мора да бидат набрани. Деновиве и пожарникарите повеќе се потат. Перфидно е тоа што во близина на пожари и онака температурите достигнуваат 800 до 1000 степени. Освен тоа, и самата опрема и облека на пожарникарите придонесува да „вријат”. Само панталоните имаат три до четири слоја, потоа колан, заштитна маска за дишење и остатокот. Севкупно на себе ставаат 30 до 40 килограми опрема.

Спасувачките служби алармираат

Рајнер Леб е во состојба на подготвеност заради високите температури. Тој е лекар во Малтешката служба за помош и главен доктор на интернационално активната организација. Таа брои речиси 31 илјада соработници и со тоа е еден од најголемите работодавци од областа на здравството и социјалата. Леб предупредува дека заради енормните жештини регулацијата на температурата во организмот кај многу луѓе може да биде префорсирана. Последиците се сончаници, топлотен удар, состојба на омалаксаност и колабирање на кардиоваскуларниот систем.

Леб за ДВ вели дека не се загрозени само припадници на одредени професии. „Бебиња и помали деца заради малата телесна површина во само ограничена мера може да ја регулираат својата температура преку потење.“ Постари лица и хронично болни имаат исто така проблеми, а кај нив и „чувството за жед е честопати попречено."

За да се спречат поголеми несреќи, соработниците на Малтешката служба во следните денови ќе ја зголемат својата подготвеност за итни интервенции. Експертот како совети за превенција користи „старски лек”, имено - да се внесуваат многу течности и повеќе да се одмара.

Дали Зелените имаат политички ќар од горештините?

Дискусијата за екстремни климатски услови одамна е составен дел од политичкиот дискурс во Германија, што со недели може да се забележи и благодарение на демонстрациите „Петок за иднината". Глобалното движење на ученици и студенти кои се залагаат за заштита на климата, и во Германија секој петок вади по десетици илјади демонстранти на улиците. Пред сѐ Зелените профитираат од растечкиот сензибилитет на населението во однос на еколошки теми. На изборите за Европскиот парламент, Зелените на ниво на Германија освоија околу 21 процент од гласовите, што е рекорден резултат и со тоа станаа втора најголема сила по ЦДУ. Оттогаш нивната популарност и натаму расте.

Според истражувањето на јавното мислење Дојчландтренд, анкета што ја спроведува Инфратест Димап со седиште во Берлин, кое е специјализирано на изборно и политичко истражување, партијата актуелно има 27 проценти поддршка.

Нико Зигел е директор на Инфратест Димап. Тој предупредува од предвремено извлекување заклучоци. Жешкиот бран и сушата минатото лето не им наштетило на Зелените и на нивниот заштитен знак, еколошката политика, но за успехот на партијата не може да се фиксира „одреден повод или поединечен настан", вели тој. Според Зигел, и нивното единство во однос на бегалската политика, тема заради која Унијата и владината коалиција речиси ќе се распаднеа, е важен фактор за успехот. „Ретко кога една партија нанадвор се покажала толку цврста колку што се Зелените во моментов", вели Зигел.

„Тоа многу гласачи позитивно го оценуваат особено наспроти многуте внатрепартиски кавги меѓу главните конкуренти."