Реакции на ЕУ, ЕП и НАТО на веста за смртта на Трајковски

На веста за трагичната смрт на македонскиот претседател Борис Трајковски меѓу првите се огласи високиот претставник на ЕУ за надворешна политка и безбедност, Хавиер Солана, упатувајќи му на семемсјтвото на загинатиот претседател и на граѓаните на Македонија изрази на сочувство во моментите на голема болка.

"Денеска е трагичен ден за Македонците, за сите луѓе во таа земја , но и за многу од нас во Европа. Претседателот Трајковски беше голем човек, емотивен , човек што ја водеше својата земја напред, не само во реформите, доведувајќи ја што е можно поблиску до Европа. "

Солана рече дека ќе биде многу тешко да се пополни празнината поради загинувањето на Трајковски. Кога е во прашање ставот на ЕУ, високиот претставник ветува:

"Луѓето во Македонија можат да бидат сигурни дека Европа ќе продолжи да ги поддржува и да им помага, за колку што е можно повеќе да се оствари сонот на претседателот Трајковски да ја доведе својата земја што поблиску до европските структури. ", рече Хавиер Солана.

Отворајќи го денешното заседание на Европскиот парламент, претседателот Пат Кокс, за Трајковски рече:

"Беше човек што донесе помирување во својата татаковина, во време кога таму имаше и премногу потенцијал за раздор. Човек што беше помирувач на регионот , вистински Европеец. Длабоко сме потресени поради трагичната загуба. Упатуваме најдлабоки изрази на сочувство до владата, парламентот, народот на Македонија, како и нашата решеност да се задржи визијата за европската перспектива на неговата земја. Ако тоа го сториме, тоа ќе биде најдобар начин на оддавање должна почест", рече Кокс.

Претседателот на Европската комисија Романо Проди, на новинарите им соопшти дека денешниот ден е ден што е многу тажен за сите. "Многу тажен ден за Македонија која загуби мудари одмерен лидер, многу тажен ден за балканскиот регион за чија интеграција Трајковски потроши многу сили. Ова е многу тажен ден за Европа , која загуби пријател и помагач на политиката на толеранција врз која почива нашата унија. Чувството е уште погорчливо, зашто денеска требаше да биде ден на радост за Македонија и Борис Трајковски , ден кога земјата требаше да ја предаде својата апликакција за членство во ЕУ . Малку луѓе направија повеќе од македонскиот претседател за остварување на оваа цел. Тој беше архитект и гарант на европската вокација на неговата земја. Сите многу тагуваме поради смртта на Борис Трајковски и се надевам дека неговата визија ќе им биде завет на сите во Македонија уште посилно да тргнат во скорешно придружување на европските институции. Тоа ќе биде најдобар начин за оддавање почит на човекот кој целиот свој живот го посвети на службата, својата земја и народот" рече Проди.

Покрај европските лдиери, се огласи и генералниот секретар на НАТО, Јап де Хоп Шефер, кој покрај изразите на сочувство, вели дека трагично настраданиот македонски претседател покажал карактеристики на добро лидерство, сочувувајќи го единството на земјата и наспроти противењето на многумина , водејќи го мировниот процес." Тоа доведе до Охридскиот договор со кој е повторно воспоставен мир и безбедност во земјата. Му оддавам признание на државникот кој се бореше за да се обезбедат демократски вредности и и' помогна на Македонија да се приближи до евроатлантските институции и НАТО" , рече генералниот секретар на воениот сојуз во рекацијата за смртта на македонскиот претседател .