Нова шанса за Џулијан Асанж

Високиот суд во Лондон ја уважи аргументацијата на адвокатите на Асанж и допушти да поднесат барање за ревизија до Врховниот суд на Велика Британија. Тоа ќе биде противтужба на пресудата на апелацискиот суд во Лондон од почетокот на декември со која е укината забраната за екстрадиција во САД.

Сега Врховниот суд треба да одлучи али ќе се изјасни за барањето за ревизија.

Американското обвинителство го товари Џулијан Асанж за шпионажа поради што му се закануваат 175 години затвор. Тој се обвинува дека со помош на инсајдерката Челси Менинг „украл“ и објавил таен материјал за воените мисии во Ирак и во Авганистан. Тоа, наводно, ги довело во опасност животите на американските доушници на терен.

Поддржувачите во Асанж гледаат јунак, истражувачки новинар кој плаќа скапа цена, бидејќи на светот му ги открил американските воени злосторства.

Лоша здравствена состојба

Австралијанецот Асанж (50) веќе 10 години е лишен од слобода. Тој во јуни 2012 година се засолни во еквадорската амбасада во Лондон откако шведските служби побараа негова екстрадиција поради обвинувања за силување и злоставување шведски државјанки. Основачот на Викиликс ги отфрли обвинувањата, сметајќи ги за маневар со кој на крајот би завршил пред американски суд.

Шведскиот налог за апсење конечно беше укинат во 2017 година, но тогашните надлежни во Британија соопштија дека ќе го приведат Асанж откако ќе ја напушти еквадорската амбасада. Тој тоа го стори во април 2019 година.

Семејството на Асанж веќе со месеци ја опишува неговата здравствена состојба како драматична. Асанж не се чувстувал добро и тешко ги следел последните сослушувања на кои присуствувал по пат на видео-линк од затворот Белмарш.