НАТО внимателно ја следи руската вежба „Запад 17“

Генералниот секретар на Алијансата кој престојува во Полска имаше средба со премиерката на земјата Беата Шидло по која изјави: „Ние внимателно ќе го следиме текот на руските маневри планирани за средината на септември“. Тој уште истакна дека сите земји имаат право да изведуваат вежби на нивните вооружени сили но исто така треба да ги почитуваат меѓународните обврски и да бидат транспарентни.

Столтенберг претходно ја обвини Русија дека ги згрозува стабилноста и безбедноста во Европа со своето агресивно однесување. „Ние активно соработувавме за да изградиме стратешко партнерство со Русија по периодот на Студената војна“, рече Столтенберг на конференцијата за одбрана и мир во Италија спроти неговата денешна посета на Полска.

Меѓутоа, агресивното однесување на Русија ги наруши стабилноста и безбедноста во Европа, додаде тој. Столтенберг наведе оти руската „илегална анексија на Крим“ претставува „прв случај по Втората светска војна некоја европска земја да земе на сила територија на друга земја“. „Русија продолжува со дестабилизација на источна Украина. Тоа е конфликт во кој речиси 10.000 Украинци се убиени и тоа во огромна мерка го промени безбедносниот контекст“, рече тој. Столтенберг додаде дека не сака конфронтација со Русија и оти силно верува во дијалог. Тој рече дека НАТО ќе испрати двајца набљудувачи да присуствуваат на заедничката воена вежба на Русија и Белорусија „Запад 17“, откако ги повика Минск, пренесува АП. Воената вежба „Запад 17“ ќе се одржи од 14 до 20 септември на трериторијата на Белорусија, а доаѓа во време на тензични односи меѓу Русија и САД.

Полската премиерка Беата Шидло пак спроти денешната средба со Столтенберг во Варшава ја обвини Русија дека со големите воени маневри во Белорусија во септември врши притисок врз Полска и врз балтичките земји и оти тие воени вежби се и демонстрации на сила на Русија и реална закана за соседите од НАТО. „Го следиме тоа, не само јас. Во разговорите со колегите, посебно од балтичките земји, разговаравме за тоа и сите сме уверени оти тоа од една страна е демонстрација на сила, но од друга страна е реална опасност за нашите земји“, изјави премиерката синоќа  за полските медиуми.

Столтенберг синоќа ја започна посетата на Варшава со средбата со претседателот на Полска Анджеј Дуда, а главна тема на разговорите била имплементација на одлуката на самитот на НАТО во Варшава минатата година, за зајакнување на источното крило на НАТО на границите кон Русија, соопшти канцеларијата на полскиот претседател.

„Апелираме до Русија во целост да го испочитува документот на ОБСЕ и да не користи правни препреки како што се експресни маневри или различни команди за она што е всушност една воена вежба“, рече во Варшава Столтенберг, јавува полската телевизија Полсат.