Ковачев го спори македонскиот идентитет

Бугарскиот европарламентарец Андреј Ковачев реагира на текстот на македонската редакција на ДВ во кој нашиот дописник известуваше за одржаната трибина на бугарски и албански историчари во Струга, кои дискутираа за Охридско-дебарското востание од 1913 година.

Ковачев, во интервју за бугарската редакција на ДВ, ги демантира тврдењата оти на собирот не биле поканети македонски историчари. „Сакам категорично да ги демантирам тврдењата дека на форумот организиран од општина Струга заедно со Бугарскиот културен клуб во Скопје и со Здружението на албанските историчари во Република Македонија, не биле поканети македонски институции и историчари. Наспроти ваквите тврдења на директорот на Државниот Архив на Македонија, Зоран Тодоровски, тоа не е точно, затоа што на форумот присуствуваше неговиот заменик, Керим Лита“, вели Ковачев.

Форумот во Струга, според Ковачев, е пример за почитување на барањата на Европскиот парламент кој бара „внимателно и критично читање на документите и обединување околу објективните историски факти за Бугарија и сегашна Македонија“. Тој натаму изразува изненаденост околу реакциите во македонските медиуми каде се критикувало тоа што на форумот не се споменало учеството на Македонците во востанието.

Македонската нација како нов „концепт“

„Во 1913 година концепти како 'Македонци“ и 'македонска нација' воопшто не постоеле. 'Македонците' на Александар Македонски и на Клеопатра 'доаѓаат' во Вардарска Македонија многу децении подоцна, за да ги легитимираат политичките амбиции на Никола Груевски и неговото опкружување за 'античките корени' на денешните граѓани на Република Македонија“, наведува Ковачев во интервјуто.

Натаму, бугарскиот европарламентарец спори и со идентитетот на Македонците.

„Нашите западни соседи (РМ, н.з.) создаваат национална доктрина во целост на сметка на историската вистина. Бугарската страна не може да го признае апсурдното тврдење на Скопје дека сегашните граѓани на Република Македонија отсекогаш биле 'етнички Mакедонци' и ништо друго. Немаме ништо против тоа секој да се чувствува како сака, но тој нов национален идентитет не смее да служи како повод за ново пишување на една историја во чие формирање свој дел имале и генерации Бугари, Турци, Албанци, Власи, Грци, Роми, Срби и други народи. Не можат да се затворат очите пред фалсификатите на соседите од денешна Република Македонија, особено доколку наложениот национален идентитет од страна на тамошните власти води кон нарушување на човековите права на оние кои таквиот идентитет не го прифаќаат“, вели Ковачев во интервјуто за бугарската редакција на ДВ.