„Мајн кампф“ станува интернет хит

Интернет-порталот Амазон (аmazon.com) го нуди електронското издание на книгата на Хитлер за 73 центи (0.99 долари), преку Ај тјунс (iTunes) може да се купи за 2,20 евра (2.99 долари). Побарувачката е незамисливо висока. Во последните месеци „Мојата борба“ достигна тиражи какви што имаат книгите кои според онлајн-продажбата се на врвот на листата на бестселери. Во категоријата „пропагандна и политичка психологија“ на Амазон, Хитлеровата „Мајн кампф“ (Mein Kampf) е на самиот врв. На американската страница на Амазон, оваа книга е оценета со 3,8 од можни 5 ѕвездички. Оставени се преку 350 коментари од читатели, во кои книгата се фали и се оценува нејзниот „фасцинантен превод“. Тоа се коментри во кои се оспорува масовното и индустриско убивање во концентрационите логори.

Хитлеровата книга забранета во Германија

„Мајн кампф“ за првпат во продажба се појави во 1925 година, а вториот дел од книгата беше објавен наредната година. Идниот диктатор во двете книги ја образложува својата политичка идеологија, како и плановите за „ново уредување“ во Германија. До крајот на Втората светска војна книгата беше отпечатена и поделена во десет милиони примероци. Со оглед на стравотиите на холокаустот, од 1945 година во Германија е забрането објавување на делото на Хитлер. По неговото самоубиство на 30 април 1945. година, целата негова приватна сопственост, вклучително и авторските права на книгата стигнаа во рацете на покраината Баварија, бидејќи Хитлер таму го имал пријавено последното место на живеење.

Во договорот со германската сојузна влада,баварката влада досега ја отфрлаше можноста за какво било ширење или печатење на книгата во Германија. Сите обиди „Мојата борба“ да се појави на германскиот пазар, имаа судски епилог. Со англискиот превод на книгата Баварија меѓутоа нема ништо, со оглед дека правата за тоа се продадени уште пред 1945. година воСАД и во Велика Британија.

Успех на дигитален план

Затоа воскреснувањето на Хитлеровата книга на англиски јазик не е никаква новост. Благодарејќи на интернет-продавниците, таа сега стана достапна во дигитална форма и може многу бргу и лесно да се симне од Ај тјунс или од Амазон. Постои дури и бесплатна верзија на англиски или изводи од книгата преведени на 17 интернет страници. А побарувачката и натаму расте.

Но од каде одеднаш толкаво интересирање за Хитлеровата „Мајн кампф“? Ова прашање си го постави Крис Фараоне и покрена дебата на интернет страницата vocative.com. Токму со едноставниот факт дека до книгата може да се дојде по дигитален пат, тој го објаснува толку големиот интерес.

Герхард Вајнберг е пензиониран професор по историја од Универзитетот Северна Каролина, кој во 1961 година ја издаде втората Хитлерова книга. Овој сега 88-годишен човек, кој во 1938. година избегал од нацистичка Германија, смета дека постои цела низа фактори за успехот на книгата на интернет.

„Првата причина е љубопитноста. За новите генерации Хитлер е фигура од минатото за кое многу слушале. А сега одеднаш преку комјутерот за малку или речиси без пари можат да го прочитаат она што тој го напишал“, појаснува Вајнберг во интервју за ДВ. „Втор фактор би можел да биде тоа што некои луѓе и натаму мислат дека Хитлер бил во право за многу работи. А да се прочита она што го напишал е еден од начините да се дознае што тој точно мислел“, смета Вајнберг.

Забраната не е решение

Забраната на книгата, смета Вајнберг, не го решава пробемот.„Дури и ако постои загриженост од повторно заживување на нацистичката идеологија, не мислам дека тоа може да се запре со забрана на книгата на интернет или со поголема цена за неа“, вели Вајнберг

И покрај тоа што Вајнберг смета дека нема потреба за забрана на „Мајн кампф“ во странство, тој сепак вели дека е исправно што книгата е забранета во Германија: „Тоа вака ќе го објаснам: ако некој некогаш имал туберкулоза, тогаш е важно редовно да го проверува своето здравје за болеста да не се повтори. А со оглед дека во Германија некогаш голем број луѓе без заболени од еден вид политичка туберкулоза, можеби таму треба да се биде повнимателен отколку во други земји“, вели Вајнберг.

Ниту во електронската ера Германија не ги намали рестрикциите кои се однесуваат на забраната за издавање, печатење и ширење на Хитлеровата книга. На германската страница на Амазон „Мајн кампф“ не може да се добие. Купувач од Германија со германска адреса не може да ја нарача книгата ни преку британските или американските интернет страници.

Издание со коментари

Д-р Рихард Вецел, научен соработник на Германскиот историски институт во Вашингтон, смета дека тие ограничувања не се најдобра опција. Тој смета дека е подобро да се објави верзија на книгата со коментари од историчари.

„Книгата е историски извор и затоа би требало да ѝ биде на располагање на јавноста. Се разбира дека постои загриженост дека многумина би можеле да ја читаат од погрешни причини и затоа би било паметно книгата да се стави во историски контекст и да се објави верзија со коментари во кои има критики“, вели Вецел.

А тоа би можело да се случи многу бргул бидејќи авторските права, кои ги поседува Баварија, истекуваат на крајот на наредната година, кога се навршуваат 70 години од смртта на Хитлер. Публицирањето на ново издание на „Мојата борба“ со соодветни коментари, која би им послужила на студенти или историчари, во тој случај би можела да стане достапна. Институтот за современа историја во Минхен веќе предложи такво нешто.