Доживотен затвор за убиство во илегална автомобилска трка
27 март 2019
Февруари 2016: двајца возачи се тркаат во центарот на Берлин. Возат со 170 километри на час низ познатиот булевар Курфирстендам. Го игнорираат црвеното светло на семафорите. На крстосницата еден од автомобилите удира во 69-годишен човек. Тој умира на лице место.
Сега, три години подоцна, Покраинскиот суд во Берлин донесе пресуда против двајцата возачи. По втор пат. Марвин Н. и Хамед Х. осудени се за убиство на доживотен затвор (насловна фотографија). Првата пресуда од пред една година беше укината од Врховниот сојузен суд во Карлсруе бидејќи не беше доволно образложена.
Смртта како нужно зло
Во новата пресуда, Покраинскиот суд во Берлин образложува дека е докажано оти двајцата обвинети, кои сега имаат 30 и 27 години, имаат долго возачки стаж и дека смртта на 69-годишникот ја „примиле со леснотија“ и тоа како „нужно зло“.
„Она што се случило немало никаква врска со невнимание. Обвинетите без причина си играле со животите на повеќе луѓе“, рече претседавачкиот судија. Тој додаде дека возачите биле „нарцисоидни и безобзирни“, и дека буквално ги обожувале своите автомобили.
Двајцата мажи возеле низ Курфирстендам со голема брзина. Возачот кој денес има 30 години, удрил во џип кој го возел пензионерот и тој починал на лице место. Возачите кои се тркале речиси и да не биле повредени.
Во завршните зборови на судењето, обвинетиот 30-годишник призна дека тој „кога би можел, би сакал да го исправи она што се случило“. И 27-годишникот нагласи дека „сака искрено да се извини“.
Нов закон
Од октомври 2017 година на учесниците во илегални трки со автомобили во населени места им се закануваат многу построги казни. Во Кривичниот закон сега постои членот 315д во кој се наведува дека, доколку во текот на „забранета трка со автомобили“ биде предизвикана смрт на трето лице, може да биде изречена затворска казна до 10 години. Сепак, во споменатиот берлински случај, тој член не може ретроактивно да биде применет. Според статистиката, полицијата во Берлин од воведувањето на новите правила до крајот на 2018 година водела истраги во 298 случаи на илегални автомобилски трки.
Врховниот сојузен суд на почетокот на март во еден друг случај потврди дека безобзирниот возач може да биде осуден и како убиец. Па така, на казна доживотен затвор во 2017 година беше осуден маж кој со украдено такси возило усмрти едно лице и повреди две други.