Гранатиран центарот на Харков

„Изутринава беше нападнат централниот плоштад во нашиот град и седиштето на управата на Харков“, изјави гувернерот на тој регион, Олег Синегубов во видео на Телеграм. Тој објави снимки од експлозијата и додаде: „Руските окупатори и натаму употребуваат тешко вооружување против цивилното население.“ Синегубов ја обвини Русија за воени злосторства.

Во текот на ноќта украинските власти информираа за голема експлозија во Харков, во која загинале најмалку 11 луѓе. Руски тенкови и оклопни возила може да се видат „насекаде“ во градот, изјави градоначалникот на Харков, Ихор Терехов.

Советник на украинскиот претседател Володимир Зеленски денеска изјави дека Русија намерно гранатирала градови, вклучително и станбени области и цивилна инфраструктура, со цел да се шири паника меѓу Украинците.

- повеќе: Руски воен конвој пред Киев, се очекува голема офанзива

„Превезот падна. Русија активно гранатира центри на градови, врши директни ракетни и артилериски напади врз станбени области и административни објекти“, рече советникот на украинскиот претседател, Михаило Подољак. Според него, целта на Русија „е јасна - масовна паника, цивилни жртви и уништена инфраструктура“.