Горна граница која не смее да се вика така

Како волкот може да се засити, а притоа да не ја допре овцата? Едноставно - со политика! Баварскиот волк Хорст Зехофер, со минус од повеќе од 10% гласови од избирачите, што за ЦСУ-услови е речиси уништувачки, навистина стигна до својот плен. „Горна граница“, забранетиот збор за лимитот за бегалци, сега во Унијата (ЦДУ и ЦСУ) е готова работа. Во ред, не се вика веќе горна граница, но повеќе за тоа подолу.

ЦСУ не сака никого подесно од себе

Така е тоа по избори: сѐ се одмерува наново. ЦСУ загуби значително, а сепак може да поставува барања. Не само затоа што на Меркел ѝ е итно потребна за владеење помалата сестричка од германскиот југоисток. Не, меѓу другото и затоа што веќе не важи старото тврдење на ЦСУ - дека десно од ЦСУ, во идеолошко-политичка смисла, не смее да има веќе никого освен ѕидот. Франц Јозеф Штраус, иконата на ЦСУ во старата сојузна република, оваа реченица ја исклеса во камен. Но, АфД на изборите на 24 септември, го помести ѕидот. Таа сега е десно од ЦСУ. Тоа Зехофер сака, односно мора да го корегира.

Постигнатата согласност во Унијата за ставање на контроверзниот поим „горна граница“ на прием на бегалци во протоколот, а не како досега само усно, е параден пример за тоа колку политиката може да биде прагматична кога на преговарачите сечилото им е буквално на гркланот.

Горната граница и Уставот

Уставноправно погледнато, горна граница воопшто не постои. Правото на азил не познава горни граници - тоа Меркел го повторуваше како мантра. Значи, мораше да се интервенира во дефиницијата, во поимот. Горната граница не важи замо за барателите на азил. Сега, она што претходно прилично остро се нарекуваше „горна граница“ треба да се предефинира со доселување како мешавина од миграција, бегалци и доселување на стручна работна сила.

Горна граница која веќе не смее така да се вика. Новата дефиниција звучи поумерено, некако попријателски и е дефинитивно - понеопределена. Широко поле, така да се каже, зашто неопходен е простор и за сондирачките разговори со Либералите и Зелените, кои сѐ уште не почнале.

На тој начин Унијата повторно може да настапува согласно името - имено, како партија на единствени сестри. И, ЦСУ може веднаш да се фати за работа и да почне да ги собира сите кои сега се подесно од неa, а кои може да се сведат под поимот „демократски лигитимни“. Во Баварија наредната година се одржуваат покраински избори. ЦСУ сака да ја отстрани дамката што ја остави резултатот на овие сојузни избори и да си ги поврати „заталканите избирачи“ од њукамерот АфД.

Муниција за покраинските избори

Ангела Меркел мораше да ја проголта првата кнедла на патот кон ковање на единствената можна коалиција - Јамајка-коалицијата. Со лингвистичко и дефинициски вешто задоволување на политички притеснетиот Хорст Зехофер, на канцеларката ѝ успеа чекорот кон деескалација, пред Либералите и Зелените воопшто да почнат да тропаат врз масата во нејзиниот кабинет со својот каталог на барања.

Значи, како Ангеа Меркел остана цела, а Хорст Зехофер стана сит? Меркел жртвуваше нешто - збор, симбол. Тоа му беше неопходно на баварецот. Тој пред себе ги има изборите, кои Меркел веќе ги остави зад себе. Зехофер може да ѝ соопшти на својата ЦСУ дека се изборил за ориентациона горна граница. А Меркел може да тврди: азилот не познава горна граница.