290611 Freiwilligendienst

Реформата предизвика сомнежи во јавноста дека нема да има доволно кадри или пак дека ќе се пријавуваат лица, кои имаат погрешна мотивација, како на пример претераната наклоност кон примена на сила. Во секој случај вработените во Бундесверот сега мораат многу поактивно да ги бараат идните колеги.

Затоа летово во голем број градови ширум Германија на главните плоштади можат да се видат припадници на армијата кои спроведуваат информативни кампањи во потрага по нови регрути. На плоштадите има воени возила, кои го привлекуваат вниманието на минувачите, се организираат квизови, а целата акција ја водат добро обучени кадри. Тие главен акцент не ставаат на оружјето и ангажманите во странство, туку на професионалните перспективи што на младите може да им се отворат преку службата во Бундесверот. Тој имено нуди 20 разни факултетски насоки и обука за вкупно 60 професии. Услов за тоа е младите да е обврзат дека подолго време ќе останат на служба во некој од трите рода на германската армија. Понудата важи како за машките, така и за жените, кои имаат право на служба во армијата од 2002 година. „Некоја девојка може исто така да стане автомеханичарка или да се обучува за некое друго техничко подрачје. Од друга страна, младите момчиња можат да се пријават за административни работи во канцеларија. Не правиме повеќе никакви разлики“, појаснува советничката на Бундесверот за професионална ориентација, Катлин Штајн.

„Сакам да се борам во Авганистан“

Оливер има 17 години и седи на платформата на голем воен камион на разговор со потполковникот Денис Буркерт, кој моментално е во улога на советник.

„Зошто се интересираш за Бундесверот?“

„Заради заедништвото.“

„А, добро! А дали се доживуваш повеќе како борец на бојно поле или сакаш повеќе да се стекнеш со соодветна наобразба, да се остручиш?“

„Повеќе како борец!“

„Добро! Можеш ли да кажеш каде би сакал да се бориш?“

„Да, во Авганистан!“

Ваквата решителност во изјавите на некои од кандидатите предизвикува сомнеж во нивната мотивација, имено дека зад желбата да се стане војник може да се крие агресивен карактер, кој што е премногу наклонет кон насилство.

Пропаганда и во училиштата

Воените советници одат и во училиштата, каде за време на наставата се обидуваат да им ги објаснат предностите од воената служба на младите. Потполковникот Денис Буркерт вели дека одзивот не е лош, но време за опуштање нема. Младите често знаат да кажат и дека воената служба не ги привлекува, бидејќи таа подразбира голема мобилност и преместување на местото на служба, а тие би сакале да се блиску до семејството. На други, пак, воениот живот им носи премногу дисциплина и ограничувања во животот. За нив би биле предолги и шесте месеци доброволно служење воен рок, а камоли да посакаат да останат во Бундесверот неколку години.

Автор: Волфганг Дик / Горан Чутаноски

Редактор: Симе Недевски