Во Хамбург очекуваат тешка битка со Вардар

Македонските претставници во машката ракометна Лига на шампионите Вардар и Металург денеска ќе се обидат да направат историски успех. Двата најдобри македонски колективи попладнево ќе ги одиграат реванш натпреварите од осминафиналната рунда, во обид, за прв пат две македонски екипи да обезбедат пласман во четвртфиналето на елитното натпреварување.

Први на сцена ќе настапат ракометарите на Металург, кои на гостувањето во Копенхаген, Данска, ќе има почетна предност од шест голови во дуелот против Колдинг, кој во Скопје го победи со 23:17. Дуелот Колдинг – Металург започнува од 16:45 часот.

„Добро подготвени за Вардар“

Шампионот Вардар на гостувањето во Германија против актуелниот европски првак ќе стартува од „нула“ по нерешените скопски 28:28.

Средбата во Хамбург ќе стартува во 18:45 часот. Германските ракометари влегуваат со засилена самодоверба по убедливата победа против конкурентот за висок пласман во Бундеслигата, Фуксе од Берлин во четвртокот вечерта (27.03) од 39:32. „Немаме многу време да се радуваме на победата над Фуксе“ изјави по мечот тренерот на Хамбург, Мартин Швалб, упатувајќи притоа на важниот меч од Лигата на шампионите со Вардар. „Мечот со Берлинчани беше многу добра подготовка за натпреварот против Вардар“ изјави поранешниот ракометар на Металург, Црногорецот Жарко Марковиќ, кој со 9 гола беше најдобар стрелец во редовите на Хамбург на мечот против Фуксе. Неговиот соиграч Штефан Шредер пак изјави: „Тоа ќе биде тежок натпревар. Ќе вложиме сѐ што е можно, за да се доближиме до нашата цел, Фајнал фор турнирот во Келн, каде сакаме да ја одбраниме нашата титула“. На клупската интернет страница се говори дека неизвесен е настапот на Ханс Линдберг, Адријан Фал и Паскал Хенс на мечот со Вардар.