Бертелсман: Демократско уназадување во ЈИЕ

Во заклучоците од проценката на германската фондација Бертелсман, која го дава таканаречениот индекс на трансформација во 128 земји во развој и во транзиција, се вели дека во текот на изминатите неколку години квалитетот на демократски избори бил полош во 15 од вкупно 38 земји во ЈИЕ и Латинска Америка. Во регионот на Источна Европа особено е влошена ситуацијата во Украина и Унгарија. Се‘ поголем е бројот на регистрирани изборни нерегуларности, купување гласови, нетранспарентно финансирање на партиите и измами. Се‘ почесто и владите во Европа посегаат по слободата на медиумите или се обидуваат да ги заплашуваат новинарите, меѓу другите земји и во Албанија, Босна и Херцеговина, Хрватска, Косово и Словачка, се наведува во резултатите од проценката на експертите на Бертелсман. Што се однесува до Латинска Америка, пак, уназадување во квалитетот на демократијата има во Аргентина, Еквадор, Гватемала, Мексико и Панама. Состојбата е влошена и во многу земји од јужна и југоисточна Африка.

Важна причина за политички негативниот развој токму во младите и „дефектни“ демократии, според „Бертелсман“, е незадоволството од социоекономскиот учинок на демократските системи. Губењето доверба на многу места поттикнува брз подем на полулистичките движења.

Индексот на трансформација на фондацијата Бертелсман го анализира и оценува квалитетот на демократија, пазарна економија и политички менаџмент во128 земји во развој и во трансформација. Се мерат успехот и уназадувањето на патот кон правна држава и пазарна економија. Проценката ја прават 250 меѓународно признати експерти, кои ја оценуваат не само состојбата на развој на земјите и проблемите со кои се соочуваат, туку и способноста на политичките актери за консеквентно спроведување на реформите. БТИ е единствен меѓународно споредбен индекс кој квалитетот на владеењето го мери со свои податоци и кој дава опширна анализа на политичките дејства во процесот на трансформација.