Железничкиот сообраќај за Битола во колапс
25 септември 2023
Пожар предизвика колапс на железничкиот сообраќај на пругата Скопје-Битола-Скопје. Во огнената стихија која што избувна викендов во битолско-прилепскиот регион, се уништени околу 1.000 прагови на повеќе локации.
Од Железници на Република Северна Македонија-Инфраструктура информираат дека интензивно се работи на отстранување на дефектот и оспособување на сообраќајот.
Сообраќајот во прекин
„Поради овие причини, сообраќајот на релацијата Скопје-Битола-Скопје ќе биде во прекин сè до оспособување на пругата за одвивање на безбеден сообраќај, се наведува во соопштението на Јавното претпријатие за железничка инфраструктура Железници на РСМ-Инфраструктура.
Од Центарот за управување со кризи информираа дека пожарите се изгаснати. На пожарот во Општина Долнени, селата Слепче и Гостиржани, поделен во два крака кои се движеа кон густа и уредена шума на велешка територија од едната страна и селото Црнилиште, Прилепско, на другата страна интервенирале два „ертрактори“ на Дирекцијата за заштита и спасување.
Моментално сообраќаат само возовите од Скопје за Велес и Скопје-Гевгелија, додека патничките возови веќе неколку години не сообраќаат на релацијата Скопје-Кочани-Скопје и Скопје-Кичево-Скопје.