Се распрсна огромен аквариум во Берлин
16 декември 2022
Берлинската полиција изутринава околу 6 часот била известена дека во хотелот ДомАкваре е оштетен цилиндричниот аквариум и дека од него истекува вода. Откорнати се и делови од фасадата на хотелот.
Берлинската противпожарна служба во меѓувреме е во акција со околу 100 луѓе, но состојбата е и натаму непрегледна. Улицата на којашто се наоѓа хотелот е затворена. Централата за сообраќајни инфомации во Берлин на Твитер напиша: „На коловозот има екстремно многу вода.“
Видеоснимки направени од гостин во хотелот покажуваат дека аквариумот е оштетен по целата своја должина. Уништени се и стаклените лифтови.
Според наводи на противпожарната служба, двајца повредени се пренесени во болница. Многу други луѓе се евакуирани од хотелот.
Во аквариумот, таканаречениот Аквадом, се наоѓаа околу 1500 тропски риби и вистински корален гребен. Нејасно е дали животните се спасени или не.
Исто така нејасна е и причината за оштетувањето на аквариумот. Според наводи на веб-страницата на ДомАкваре, големиот аквариум бил целосно модернизиран во 2020 година. Полицијата соопшти дека сега ќе треба да се провери дали од експлозијата на цилиндричниот аквариум е оштетена и конструкцијата на хотелот.