Марко Рубио е нов државен секретар на САД

Американскиот Сенат едногласно го потврди Марко Рубио за државен секретар, со што стана првиот член на кабинетот на старо-новиот американски претседател Доналд Трамп. Републиканскиот сенатор од Флорида беше еден од најмалку контроверзните кандидати на Трамп.

Гласањето на Сенатот беше јасно, 99 спрема 0.  „Марко Рубио е многу интелигентен човек  со извонредно разбирање на американската надворешна политика“, го пофали републиканскиот сенатор Чак Грасли од Ајова на отворањето на седницата.

Традиционално е Сенатот да се состане веднаш по манифестацијата на инаугурацијата за да започне со потврдување на  тимот на новиот претседател.  За време на првиот мандат на  Доналд Трамп, Сенатот првиот ден ги потврди неговите секретари за одбрана и за домашна безбедност. Брзо гласање се очекува и за  друг кандидат,  Џон Ретклиф, на кого Трамп сака да му ја довери разузнавачката агенција за странство ЦИА. Гласањето за  другите кандидати,  вклучително и ветеранот и водител на Фокс њуз, Пит Хегсет за секретар за одбрана, се очекува да се одржи подоцна оваа недела.