Почина екс шефот на одделот за пропаганда во Северна Кореја

Долгогодишниот шеф на партискиот оддел за пропаганда на Северна Кореја, Ким Ки Нам, почина на 94-годишна возраст од старост и повеќекратно откажување на органите, објавија денеска (8.05) државните севернорејски медиуми. Како директор на одделот за пропаганда и агитација на владејачката Работничка партија, Ким служеше под тројца владетели. Ким некогаш беше озлогласен во Јужна Кореја, каде што го споредуваа со нацистичкиот министер за пропаганда Јозеф Гебелс и затоа го нарекуваа и „севернокорејски Гебелс“.

Според досегашните информации, за починатиот се подготвува државен погреб. Водачот Ким Јонг Ун го посетил одарот со поранешниот партиски секретар и „херој на трудот“ за да го изрази своето искрено сочувство. Ким Ки Нам одигра „извонредна улога во создавањето на монолитниот систем на лидерство на заслужниот другар Ким Јонг Ун“, се вели во Пјонгјанг. Ким Јонг Ун е внук на „вечниот претседател“ Ким Ил Сунг и син на поранешниот владетел Ким Јонг Ил, кој почина на крајот на 2011 година.

Ким Ки Нам служеше во партиската централа повеќе од четири децении, напишаа ушште за време на неговиот живот експертите на веб-страницата Северна Кореја Лидершип Воч. Според нив, тој имал огромно влијание „на печатот, медиумите, ликовната уметност и издавачката индустрија на земјата“. Тој, исто така, одигра водечка улога во одобрувањето или пишувањето есеи, слогани и други медиумски производи за поддршка на наследувањето на власта.