Путин во посета на Виетнам

Виетнам сака да ги зајакне врските со Русија, изјави денеска (20.06) виетнамскиот претседател То Лам на состанокот со рускиот претседател Владимир Путин во Ханој. Лам му честиташе на Путин за неговиот реизбор и ги пофали достигнувањата на Русија, вклучително и „домашната политичка стабилност“.

Путин во Ханој беше пречекан со воени почести, но не толку високи како што тоа беше случај во Северна Кореја, каде беше лично пречекан од лидерот Ким Јонг Ун.

Северна Кореја и Русија договорија пакт за меѓусебна одбрана

Според информациите на севернокорејската државна новинска агенција КЦНА по самитотмеѓу севернокорејскиот лидер Ким Јонг Ун и рускиот претседател Владимир Путин во Пјонгјанг, Северна Кореја и Русија се обврзале да си пружат воена помош во случај на напад. Двете земји, како што се вели, меѓусебно се увериле дека ќе си ја пружат „сета можна воена и друга поддршка“ во случај на вооружен напад. Тие, исто така, се договориле да не склучуваат никакви договори со трети земји кои би можеле да им наштетат на интересите на партнерот. Освен тоа, ниту една од државите нема да дозволи нејзината територија да се користи за загрозување на безбедноста и суверенитетот на другата.

Од Пјонгјанг се вели дека договорот за сеопфатно стратешко партнерство ја регулира и соработката во области како што се нуклеарната енергија, вселенските патувања и безбедноста на храната и енергијата.