Огромно количество ураниум исчезнало во Либија

Инспекторите на Агенцијата за атомска енергија на ОН (МААЕ) утврдија дека исчезнале околу 2,5 тони природен ураниум во Либија од местото каде што биле складирани, а кое не е под владина контрола, им соопшти агенцијата на државите членки.

Исчезнувањето на ураниумот е утврдено со инспекција која била планирана за 2022 година „но, морала да биде одложена поради безбедносната ситуација во регионот“ и е извршена во вторникот, соопшти генералниот директор на МААЕ, Рафаел Гроси.

Инспекторите на МААЕ „утврдија дека исчезнале 10 контејнери со приближно 2,5 тони природен ураниум кои претходно ги пријави Либија на таа локација“, се вели во соопштението на ИАЕА.

Агенцијата наведува дека ќе спроведе „други активности“ за да ги утврди околностите на отстранувањето на ураниумот од местото каде што бил складиран, но не ја именуваше локацијата.

Исчезнувањето на нуклеарниот материјал може да значи радиолошка опасност и оправдана загриженост за безбедноста, предупредува МААЕ. Се додава дека доаѓањето до тоа место би можело да биде опасно и оти воопшто да се дојде на таа локација е потребна „сложена логистика“.

Во 2003 година Либија, во која тогаш на власт беше долгогодишниот лидер Муамар Гадафи, се откажа од својата програма за нуклеарно оружје, а претходно имаше набавено центрифуги за збогатување на ураниум како и нацрти за изградба на нуклеарна бомба во што не напредуваше многу.

Либија не доби мир ни откако Гадафи беше соборен од власт со помош на кампањата на НАТО во 2011 година. Од 2014 година политичката контрола во земјата ја имаат две сопернички фракции.