Москва: Украински воздушен напад врз руски градови

Во ноќта по најголемиот воздушен напад врз Украина од почетокот на војната, руската војска соборила  32 украински беспилотни летала над Москва и други делови од земјата.

Како што денеска соопштија руски воени претставници, украинските дронови биле пресретнати од воздушната одбрана над руските региони Брјанск, Ориол и Курск, во близина на украинската граница и над Московската област, објави Министерството за одбрана на Телеграм.

Украинскиот напад со дронови следува по вчерашната серија руски напади со ракети и беспилотни летала ширум Украина во кои, според властите во Киев, загинаа најмалку 30 лица, а беа ранети преку 160.

Киев уште соопшти дека тоа бил „најголемиот воздушен напад врз украинските градови и села“ откако Русија ја започна својата инвазија врз Украина во февруари 2022 година .

Руското Министерство за одбрана, пренесе Ројтерс, објави дека противвоздушната одбрана во петокот уништила 13 украински ракети над јужниот регион Белгород, а регионалниот гувернер објави дека едно лице загинало, а четворица се ранети.

Министерството додава дека противвоздушната одбрана „го спречила обидот на Киев да изврши терористички напад“.

Вјачеслав Гладков, гувернерот на Белгород, потврди дека во нападот биле оштетени десет куќи и дека е оштетена и водоводната инфраструктура.

Александер Богомаз, гувернерот на Бријанск, соопшти дека над неговата област биле соборени шест беспилотни летала и оти е „спречен уште еден украински терористички напад“. Во тој напад немало жртви.

Во меѓувреме, на итно свикана седница на Советот за безбедност на ОН, повеќето членки на Советот, вклучувајќи ги САД, Франција и Велика Британија, го осудија смртоносниот руски воздушен напад врз Украина. Рускиот амбасадор во ОН Василиј Небензја, пак на седницата, изјави дека Москва ја нападнала само воената инфраструктура и дека украинските системи за воздушна одбрана се одговорни за цивилните жртви.