Мицкоски најави нов ветерен парк кај Карбинци

Мандатарот Христијан Мицкоски ја најави првата странска инвестиција - нов ветерен парк меѓу Карбинци, Штип и Радовиш за производство на електрична енергија. Во рамките на Македонскиот енергетски форум (МЕФ) во Скопје, тој рече дека станува збор за голема инвестиција која во моментов предвидува производство на приближно еден терават час електрична енергија или еден милион мегават часови, што е приближно 20 отсто од целокупното производство на електрична енергија во земјата. 

Енергетската транзиција е сложен процес

Мицкоски не е убеден дека за 365 дена земјата може да има стабилно снабдување со електрична енергија од обновливи извори. Според него, во енергетиката не се возможни брзи резултати - мора да се има предвид реалноста и да се работи врз основа на прецизни планови.

„Кога се работи за енергетската транзиција треба да имаме предвид дека процесот е сложен и многу скап. Секогаш кога се исклучува реалноста, правиме грешки. За жал, која е реалноста? Нашата земја е сиромашна, па вистинското прашање е - дали Македонија може да си дозволи енергетска транзиција за толку краток период без да добие поддршка од надвор? Дали имаме човечки капацитет за таква транзиција и дали нашиот систем може да си ја дозволи?“, вели мандатарот. 

Во моментот повеќе од 4 000 семејства зависат од производството на електрична енергија од термоелектраните, термоелектраната во Битола и Осломеј. Според Мицкоски, лесно е да се зборува за енергетската транзиција, но не е толку лесно да се зборува за човечките животи. Но, со добар план и добар надзор во енергетските капацитети ќе може да се заврши процедурата за енергетска транзиција. 

Приоритети 

Енергетската ефикасност ќе биде приоритет на идната влада, а завршувањето на грчко-македонскиот гасовод нема да ја комплетира сликата без дополнителни интерконектори кон централна и централно-источна Европа. Според Мицкоски, паралелно со енергетската транзиција, земјата ќе мора да ги имаме предвид и социјалните аспекти, а ќе мора да се грижи и за загревањето, зашто и загадувањето треба да биде меѓу клучните приоритети.

„Нашиот најголем приоритет во иднина ќе биде да ги балансираме енергетското тргување, од една страна, зашто тековно сме земја која увезува и да креираме одржливи решенија, од друга страна, да го реорганизираме нашиот пазар на електрична енергија па наместо да увезуваме, да извезуваме струја. Тоа ќе го избалансира нашето портфолио и ќе придонесе за раст на домашниот производ и за поддршка на економијата“, рече мандатарот. 

Американската амбасадорка во земјава Анџела Агелер, порача дека енергетската сигурност и зелената енергија се двата приоритета кои треба да ги надминат партиските политики. Таа оцени и дека земјата треба да го заврши грчко-македонскиот гасовод кој ќе ги елиминира зависноста од Русија и заканите на одредени прекини во снабдувањето. 

„Со интерконекторот Северна Македонија ќе може да гради централи со погон на гас и да ја олесни транзицијата од јаглен кон други извори“, рече Агелер. 

Според евроамбасадорот Дејвид Гир, Северна Македонија треба итно да го усогласи националното законодавство со најновите ЕУ стандарди и легислативи за обновливи извори и енергетска ефикасност за да држи чекор со равојните трендови на Унијата. Ќе мора и да ги воспостави неопходните механизми за да биде дел од шемата за размена на енергија на ЕУ во иднина, рече Гир.