Зеленски во Конгресот: „Ќе победиме бидејќи сме единствени“

Посетата на украинскиот претседател, Володимир Зеленски, на САД се очекуваше со нетрпение. Тој не ја напушти својата земја уште од почетокот на војната, на 24 февруари. По состанокот со американскиот претседател, Џо Бајден, во Белата куќа, Зеленски одржа и говор во американскиот Конгрес, на заедничката седница на Сенатот и на Представничкиот дом.

Аплаузот по влегувањето на Зеленски во конгресната сала траеше повеќе минути. Пратениците и сенаторите го дочекаа со оваации. Длабоко трогнат, украинскиот претседател стоеше на говорницата во маслинесто зелен воен џемпер и панталони. Потоа одржа речиси половиначасовен говор, кој повеќепати беше прекинуван со аплаузи.

Покрај сите неприлики и „сценарија за судниот ден“, Украина не падна, рече Зеленски. Украина е жива и здрава. Тој, воедно, се заблагодари на поддршката од САД. „Вашите средства не се милостина“, нагласи тој. „Тие се инвестиција во глобалната безбедност и демократија, и Украина со нив ќе се однесува со најголема одговорност.“

Бајден вети пакет помош вреден милијарди

На состанокот, претходно одржан во Белата куќа, американскиот претседател му вети на Зеленски нова воена помош за Украина во износ од 1,85 милијарди американски долари. Во тоа спаѓа и испораката на системот за противвоздушна одбрана „Патриот“, кој Зеленски го бараше со месеци. „Патриот“ може да неутрализира авиони или проектили и на поголема одалеченост, а се смета дека украинските војници за користење на овој систем веројатно ќе бидат обучени на американскиот воен полигон во Графенвер во Баварија. 

Со оглед на тоа оти републиканците би можеле да ја блокираат помошта за Украина, бидејќи од јануари ќе имаат мнозинство во Представничкиот дом, Зеленски рече оти се надева дека двете партии во Конгресот ќе продолжат да ја поддржуваат Украина. Оваа борба, вели, ќе одлучи за светот во кој ќе живеат нашите деца и внуци, и нивните деца и внуци.

Зеленски потоа ја изненади претседателката на Претставничкиот дом на американскиот Конгрес, Ненси Пелоси, подарувјќи ѝ знаме од градот Бахмут со потписи на украинските војници кои се борат таму. Знамето, како што рече, е симбол на победа. „Цврсто стоиме, се бориме и ќе победиме бидејќи сме обединети - Украина, Америка и целиот слободен свет“, рече Зеленски. И додека Пелоси и потпретседателката Камала Харис го држеа украинското знаме во раце, тој се прости посакувајќи им на сите „среќен Божиќ и среќна победничка Нова година“.