Германија: Субвенции за струја од 12,7 милијарди евра
5 октомври 2022
Четирите германски компании кои ја дистрибуираат електричната енергија до потрошувачите во земјата ќе добијат 12,7 милијарди евра од германската влада со цел да се намалат трошоците за граѓаните поради енергетската криза. Трошокот за дистрибуција на струјата на сметките кои ги добиваат домаќинствата се проценува на околу 10 проценти од целата сума, додека кај индустријата таа е околу една третина од трошокот.
Владината интервенција ќе ги стабилизира сметките, велат извори во владата и индустријата, кои инаку би пораснале на линија со растечките цени на енергијата и на оперативните трошоци.
Надоместот за пренос и дистрибуција на електричната енергија кој го плаќаат германските корисници ќе порасне на 3,12 евроценти, соопштија претходно четирите оператори. За споредба, минатата година таа сума изнесуваше 3,08 евроценти.
Трошоците требаше да пораснат далеку повеќе поради растот на цените за енергенсите и за балансирање на флуктуациите во снабдувањето на поврзаните европски мрежи, но тие трошоци ќе бидат покриени од владата со 12,7 милијарди евра.