Се исплатува ли признавање на дипломата во Германија?

Јусуф Гинај своите искуства од Германија ги опиша на Фејсбук-страницата на своето старо училиште во Турција: „За луѓето да знаат што ги очекува овде“.

Гинај е еден од првите во Германија чии странски квалификации се признаени според новиот сојузен закон. 38-годишникот е квалификуван градежен техничар - проектант.

Тој 20 години во Германија се водеше како необразуван и мораше да чисти по болници, да помага на градилишта и да ги одржува спортските терени во градот Бон, под мотото, главно да се има работа.

Во 2012. година турскиот козулат му укажа на можноста дека благодарение на новиот закон и граѓаните надвор од ЕУ имаат право на постапка за признавање на квалификациите. Оддел на Индустриската и трговска комораво Нирнберг, ФОСА (Foreign Skills Approval) е централното собирно место за сите неакадемски трговски и технички професии.

Овде до крајот на 2012. година се стигнати околу две илјади барања. Околу 600 се позитивно решени, натамошни 400 потврди издадоа занаетчиските комори. Кај околу две-третини странската квалификација е призната како рамна на германската.

И делумното признавање носи предности

Дипломата на Јусуф Гинај само делумно одговара на денешното германско образование низ работа. Но, според гледиштето на коморите, и делумното признавање има вредност, зашто прецизното утврдување на постоечките и знаењата кои недостасуваат на работодавачите често им е доволно или пак им нуди почетна основа за натамошно образование.

Порталот има над 250 илјади посетители. Околу 40 проценти од нив кликаат од странство. Повеќе илјади заинтересирани се јавиле и телефонски на дежурната телефонска линија на Сојузната служба за миграција и бегалци +49 30 18151111. Најчесто луѓето прашуваат за професиите лекар, инженер, болнички негувател или воспитувач, каде пристапот кон работниот пазар е особено строго регулиран. За многу други професии во Германија постојат различни правила во покраините.

Секој случај е посебен

За јазот меѓу високата бројка барања и позитивно решените случаи постојат повеќе причини. Постапката за признавање во првите месеци, на пример, мора да тече според принципот „learning by doing“.

Теоретските и практичните наставни содржини се споредуваат со документи кои често се стари со децении. Во законот нема датум за застарување на дипломите. Јусуф Гинај постапката ја забрзал со тоа што самиот ја доставил листата со наставни предмети што недостигала, а која ја обезбедил од архивот на своето турско училиште.

Кај поголемите разлики одлука дали тие можат да бидат изедначени преку докажано работно искуство или натамошно образование донесува Службата за регистрациуја во Нирнберг. Секој предмет е уникат, зашто подносителите на барања потекнуваат од 68 држави и се работи за 110 професии.

Многумина мигранти само се информираат, а не доставуваат барање. Веројатно нив ги одвраќаат високите трошоци и неизвесниот исход. За својот случај Јусуф Гинај платил 420 евра такси за обработка и уште толку за превод и нотарски потврди на документите.

Понуди на избор

Оние кои мораат да ги надополнат квалификациите, стојат пред навистина непрегледен избор. Во Германија постојат околу 25 илјади факултети, училишта за стручно образование и народни универзитети, образовни работилници, академии за професии и приватни институти.

Но, овие понуди одговараат само условно и според лична потреба, истакнува Кристијан Биниг од Службата за интеграција преку квалификација. Германското дополнително образование традиционално има форма на курсеви, на сите учесници им се посредува со однапред одредени содржини. Со други зборови, ако некој има потреба од дополнување на образованието од две недели, а друг од две години, голема е можноста тие повторно да се сретнат во иста квалификациона постапка.

Кон ова доаѓаат и високите трошоци. Парите се можеби добро инвестирани, но за подносителот на барањето за признавање на дипломата се поставува прашањето - каде да ги најде парите? За невработените плаќа Агенцијата за вработување. Оние со мали примања можат да побараат пари од фондовите за поддршка на државата и покраините, кои покриваат барем дел од трошоците.

И стипендиите би биле шанса инженерите кои возат такси и чистачките со диплома на лекар конечно да најдат соодветна работа. Но, тие се ретки. Фондацијата Меркатор во зимскиот семестар додели 32 стипендии на доселени академци, кои сега се на натамошни студии на универзитетите Дуизбург-Есен и Регенсбург. Фондацијата Ото Бенеке и сенатот на Хамбург се единствените натамошни адреси.

Решавачки се работодавачите

Можност се и стипендиите од фирмите, зашто на крајот работодавачите се тие кои се жалат на недостиг на квалификувана работна сила. Тие исто така треба да дадат конечна оценка дали признавањето на дипломите има смисла или не.

Јусуф Гинај, кој моментно работи како хаусмајстор во градската управа, ги поднесол своите нови документи во општината и сенадева на подобрување:

„Не се добива ништо ако само се смени друг документ, треба да се смени нешто во главите“, вели тој.