Сепаратистите во Украина повторно воведоа смртна казна

Руската агенција Тас јави дека лидерот на проруските сепаратисти во источна Украина, Денис Пушилин потпишал указ со кој се укинува мораториумот на смртна казна. Минатиот месец сепаратистите осудија на смрт тројца странци во редовите на украинската армија - двајца Британци и еден Мароканец. Во моментов сите тројца имаат поднесено жалба и чекаат одлука. Пресудите, како што се најавува од страна на сепаратистите, би можеле да паднат во текот на месецов.

Доколку не биде укината пресудата на првостепениот суд, или обвинетите не бидат разменети, тие се соочени со стрелање. Портпаролот на Кремљ, Дмитриј Песков, не исклучи таква можност и рече дека Русија немало да се меша во судските одлуки на „Народна Република Доњецк“.

Според медиумски извештаи, во рацете на проруските сепаратисти во источна Украина има и други странци. На руската телевизија како заробеници беа прикажани и двајца Американци.