ВМРО-ДПМНЕ со реплики го блокира Собранието

Снимка од поранешниот премиер и лидер на ВМРО-ДПМНЕ, Никола Груевски од аеродромот во Истанбул од претпладнево кружи низ медиумите и социјалните мрежи во Македонија. Снимката на која се гледа како Груевски се симнува од авион на „Туркиш Ерлајнс“ ја објави Фејсбук профилот на емисијата „360 степени“ на телевизијата Алсат-М. Од неговата партија велат дека Груевски е на пат кон Малта каде треба да присуствува на Конгресот на Европската народна партија- групата конзервативни европски партии кон која припаѓа и ВМРО-ДПМНЕ. Конгресот на ЕПП на Малта ќе се одржи на 29 и 30 март.

Во истовреме, во Собранието денеска започна седницата на која треба да се утврди изборот на нови членови на Комисијата за избори и именувања, како и да се избере нов собраниски спикер.

Пратениците на ВМРО-ДПМНЕ и партиите од нивната коалиција веќе неколку часа со реплики и контрареплики го оневозможуваат нормалниот тек на заседанието. Во нивните говори воглавно се критикува, како што велат, „Тиранската платформа“ и СДСМ.
Антонио Милошоски од ВМРО-ДПМНЕ побара новиот претседател на Собранието да биде од редовите на неговата партија, затоа што на тој начин ќе се „изрази волјата на граѓаните“.
Претседавачот со собраниската седница Трајко Вељановски им дозволи на пратеници да си реплицираат меѓусебно иако таквата пракса не е дозволена со Деловникот. Објаснувањето на Вељановски е дека пратеничките групи сѐ уште не се формирани, па пратениците од иста пратеничка група можат да ја користат таа можност.