Пакистан ги деблокира копнените патишта за НАТО

Меѓународните трупи во Авганистан повторно можат да ги користат копнените патишта преку Пакистан за дотур за војската. Владата во Исламабад ја укина блокадата за затворање на рутите воведена минатиот ноември, по еден воздушен напад на НАТО врз пакистанска гранична база, соопшти американкиот државен секретар Хилари Клинтон. Клинтон во телефонски разговор со нејзиниот пакистански колега Хина Рабани Кар се извини за овој напад во кој загинаа 24 пакистански војници.

НАТО го поздрави најавеното повторно отворање на рутитет за дотур за трупите во Авганистан од страна на пакистанската влада. Деблокадата на договорите за транзит за снабдување на Меѓународните ИСАФ трупи во Авганистан „демонстрира засилена соработка меѓу земјите на ИСАФ и нашиот партнер Пакистан“, изјави генералниот секратар на НАТО Андерс Фог Расмусен. Истовремено тој ја подвлече, „важната улога“ на Пакистан за „безбеден Авганистан и стабилен регион“.

Копнениот пат преку Пакистан е еден од најважните патишта за снабдување на меѓународните сили во Авганистан. Отворањето на рутите има големо значење и за планираното повлекување на странските трупи на крајот во 2014 година.