Обвинувања за сексуално вознемирување против судијата Кавано

Брет Кавано мора да се брани од #MeToo-обвинувања пред конечната одлука за тоа дали тој ќе биде нов судија во Врховниот суд во САД. „Њујоркер“ во петокот објави анонимна приказна на една жена, која сега го откри својот идентитет во „Вашингтон пост“.

Кристин Блеси Форд, 51-годишна професорка по психологија на еден универзитет во Калифорнија, за весникот раскажува за забавата во близина на Вашингтон во раните 1980-ти, на која присуствувала како средношколка. Била „мртва пијана“ во моментите кога Кавано ја притиснал на креветот и ја допирал. Се обидел да ја соблече и во моментот кога се обидела да вреска, ѝ ја држел устата затворена. „Мислев дека несакајќи ќе ме убие“, вели Форд за весникот и додава: „Тој се обиде да ме нападне“.

За весникот „Њујоркер“ жената анонимно раскажа дека Кавано се обидел да ги прикрие нејзините обиди за ослободување пуштајќи ја музиката погласно. Форд тврди дека некако ѝ успеало да се ослбоди и дека за инцидентот не зборувала со никого, сѐ додека во 2012 година тоа не го раскажала на психотерапевт за време на брачна терапија со нејзиниот сопруг.

Форд инцидентот веќе го опишала и во доверливо писмо испратено до сенаторката од Калифорнија, Дајен Фајнстин. Фајнстин, откако обвинувањата станаа јавни, побара ФБИ да покрене истрага пред Сенатот да донесе одлука за номинацијата на Кавано. Сенаторот од Њујорк, Чак Шумер, кој ја води пратеничката група на демократите, веќе побара одлагање на гласањето во Сенатот за да може темелно да се истражат „сериозните и веродостојни обвинувања“. Портпарол на републиканскиот сенатор Шак Гресли, кој раководи со Комисијата за правосудство, изјави дека сенаторката Фајнстин требало порано да ја отвори темата. „Тоа отвора прашања за тактиките и мотивите на демократите“, изјави портпаролот.

Брет Кавано го отфрла обвинувањата „категорично и недвосмислено“. Тој е кандидат на претседателот Доналд Трамп за наследник на судијата Ентони Кенеди. Со оглед на тоа што судиите во Врховниот суд се избираат доживотно, Трамп со изборот на конзервативнуиот судија би можел со децении да ѝ дава белег на работата на Судот. Судијата Кавано е католик кој се ангажирал за различни црковни заедници. Неговите ставови против абортусот предизвикуваа жестоки реакции во јавноста во минатото.