„Ние во Вардар сме 18 браќа“
3 јуни 2019
Најдобриот ракометен клуб во Европа годинава се вика Вардар Скопје, пишува онлајн изданието на весникот Шпигел во текстот насловен „Вардар Скопје ја освои круната“, надополнувајќи дека и еден Германец можел да се радува на големиот успех - Кристијан Дисингер. Шпигел, како и останатите медиуми, го истакнуваат фактот дека Вардар по 2017 година по вторпат ја освојува титулата европски првак.
Новинската агенција ДПА најдетално се осврна на успехот на Вардарци и на приказната на Дисингер во македонскиот клуб:
„Откако Кристијан Дисингер со Вардар Скопје се искачи на европскиот ракометен трон, за поранешниот германски репрезентативец започна маратонска забава. Во моментите на триумфот на 27-годишниот ракометар не му беше важна ниту неговата спортска иднина. 'Во наредните три, четири дена само ќе се слави, а потоа ќе видиме како натаму', изјави Дисингер еуфорично по победата од 27:24 во финалето против Веспрем“, пишува ДПА, надополнуувајќи дека на дочекот во главниот град на Северна Македонија се очекува да се појават 100 илјади луѓе. Но, како што истакнува ДПА, за Скопје ова сега е последна можност за голема забава, бидејќи по најавеното излегување на главниот спонзор тимот составен од играчи од десет нации веројатно ќе се распаднел.
Агенцијата го цитира Дисингер кој вели дека тимот нема да може да продолжи да игра на досегашното ниво. И самиот тој нема нов договор и неговата спортска иднина е неизвесна:
„Уште во изминатите девет месеци на Дисингер и на соиграчите платите им беа исплаќани нередовно или делумно. Дотолку повисоко треба да се вреднува вториот триумф на Вардар во Лигата на шампионите. 'Ние во Вардар не сме само тимски колеги, туку 18 браќа, кои уште повеќе се зближија откако дојде веста дека на клубот му се заканува крај', ја откри Дисингер со патос во гласот тајната на изненадувачкиот успех“, пишува ДПА и дополнува дека Дисингер не се има целосно откажано од иднината во Вардар: „Можеби по победата во Лигата на шампионите некој ќе ја отвори неговата каса.“
Повеќе:
-Фотографија на денот: Вардар, пехар, солзи...
Весникот Франкфуртер Рундшау пак известува за новата титула на македонскиот првак под насловот „Вардар Скопје му го исполни сонот на Дисингер: победа на Фајнал форот“.
Овој весник, но и другите медиуми, притоа истакнуваат дека Вардар од самиот почеток на финалето ја имал контролата врз мечот, која не ја испуштил до последниот момент. Спортскиот портал Спорт4Финал пак ги пренесува изјавите на ракометарите и тренерот на Вардар, Роберто Парондо, по мечот. Најдобриот играч на Ф4 турнирот Игор Карачиќ порача: „ Им покажавме на Европа и на светот дека не е сѐ во парите... Пехарот со Вардар ми значи сѐ“. За Даинис Крисштопанс вчерашната вечер била како бајка, а тренерот Роберто Парондо признава дека не ја знае тајната на успехот на Вардар.
Порталот ги цитира и изјавите на капитенот Стојанче Стоилов: „Ова е наш хепи енд, извонредна победа за нас и за мојата земја“, но и изјавата на Кристијан Дисингер: „Веројатно можеме да очекуваме 100 илјади луѓе на улиците на Скопје. Тоа веќе го имаме видено во 2017 година. А исто така и она што навивачите го направија тука во арената е извонредно. За нив е многу скапо да дојдат овде, па сепак тие лудо нѐ поддржуваат“.