Весели: Белград треба подобро да ја слуша Меркел
14 септември 2018
ДВ: Господине Весели, дали ќе има промена на границите или размена на територии?
Весели: Не, нема да има. Ќе има признавање на независна и суверена држава Косово. Ќе има недопирливост на нашата државна територија и целосен суверенитет. Нема да има заедница на српски општини со извршни компетенции кои го загрозуваат уставниот поредок и територијалниот интегритет на Косово.
Претседателот на Србија Александар Вучиќ пред неколку дена рече дека нема да ја признае државата Косово. Кој е Вашиот став за тоа?
Симпатичен е претседателот на Србија, Вучиќ. Неговите говори за мир се добри, но кога го промовира Милошевиќ, тоа ни нему не му оди на чест. Ние сме заинтересирани и многу гласни што се однесува до правата на Албанците во Прешевската долина. Треба да се почитуваат нивните права во школството и останатите домени, тие треба да ги уживаат правата кои ги уживаат Србите во нашата република.
Јас бев таму изминативе денови и видов дека Албанците таму се многу заинтересирани да се спојат со Косово. Тие се уште имаат проблем со недостатокот на учебници.
Тоа е дел од нашата национална болка и ние сочуствуваме со нив. Ние ќе бидеме со нив, но без давање преголеми надежи и без злоупотребувањето на нивната состојба. Ние бараме од меѓународните партнери, но и од претседателот Вучиќ, доколку е навистина заинтересиран за европски интеграции, да ги третира своите граѓани Албанци кои живеат во Србија на достоинствен начин. Во спротивно, состојбата нема да биде поволна и нема да има добри предуслови за успешен дијалог.
Дали жителите на Прешевската долина треба да се откажат од своите соништа?
Жителите на Прешевската долина се Албанци, горди луѓе, и ние секогаш ќе бидеме со нив. Тие никогаш не треба да се откажат од своите соништа.
Што очекувате од дијалогот?
Од дијалогот очекуваме признавање на независно и суверено Косово со почитување на интегритетот. Истовремено, очекуваме добро соседство. Минатото меѓу Србите и Албанците не беше добро. Мораме дефинитивно да се свртиме кон иднината. Истовремено, убеден сум дека пораките на госпоѓа Меркел треба малку подобро да се слушаат и во Белград, бидејќи тие во целост се сфатени на Косово.