Еквадор му го одзеде државјанството на Асанж

Суд во Еквадор му го одзеде државјанството на таа земја на основачот на Викиликс, Џулијан Асанж.Судиите во главниот град Кито оценија дека при доделувањето на државјанството на Асанж, кој инаку е Австралиец по потекло, биле направени административни грешки. Адвокатот на Асанж, Карлос Поведа, најави дека ќе вложи жалба на одлуката на судот.

Асанж во моментов е во лондонскиот затвор Белмарш, каде ја чека одлуката по едно барање од САД за негова испорака. САД го обвинуваат дека заедно со свиркачот Челзи Менинг украл таен материјал од американските воени бази во Ирак и Авганистан и го објавил на платформата Викиликс. Со тоа, како што се вели од Вашингтон, тој го довел во опасност животот на информанти во многу земји во светот. Во случај да биде осуден во САД, на Асанж му се заканува долгогодишен затвор.

Асанж побегна во еквадорската амбасада во Лондон во 2012 година со цел да избегне испорака.Тој таму доби азил, а во 2017 година и еквадорско државјанство. Владата на јужноамериканската земја тогаш планираше да му додели дипломатски статус на Асанж за да може безбедно да го изнесе од зградата на амбасадата. Подоцна, меѓутоа, дојде до тензии помеѓу официјален Кито и Асанж. Еквадорската влада во 2019 година му го одзеде азилот на Асанж и тој беше уапсен од страна на британската полиција поради тоа што, како што се вели, ги прекршил условите на судската гаранција, кога во 2012 година се сокрил во амбасадата.

Борци за човекови права сметаат дека судскиот процес против Асанж, исто како и затворските услови, претставуваат елементарно кршење на човековите права. Тие на судските постапки против него гледаат како на обид за замолчување на свиркачите кои на виделина изнесуваат непријатни вистини. Промената на ставот на Еквадор во врска со Асанж, според набљудувачите, се должи на надворешнополитички притисок од страна на САД.