Активистите бараат 1% од БДП за заштита од аерозагадувањето
7 ноември 2017
Поради катастрофалната еколошка состојба во Македонија, еко-активистите бараат од владата да издвојува средства од буџетот во вредност од еден отсто од БДП во посебен фонд за заштита на животната средина.
„Потсетуваме дека според Светската Банка (2015), како последица на аерозагадувањето македонската економија трпи годишни загуби од 253 милиони евра или 3,2% од БДП, што значи дека реалниот раст на економијата изминативе години е 0%. Овој тренд мора да запре“, велат од здружението.
Екологистите ги наведуваат податоците на Еуростат, во 2015 година Словенија одвоила 389 милиони евра, а Бугарија - 358 милиони евра од буџетот за заштита на животната средина. Вкупните расходи за заштита на животната средина на владите во ЕУ-28 земјите изнесувале просечни 0,8% од БДП. Годишниот буџет на Министерството за животна средина и просторно планирање на Македонија варира помеѓу пет и десет милиони евра.
Активистите велат дека проектот „Скопје 2014“ за кој државата потроши 700 милиони евра пари на граѓаните, е пример за лошо приоретизирање на јавните политики.
„Го повикуваме Министерството за животна средина итно да изготви акциски план и соодветни проекти за бараните средства“, бараат активистите.
Скопската општина Аеродром најави први конкретни мерки за заштита на животната средина. Градоначалникот Златко Марин најави дека општината ќе издвои околу 300.000 евра за реализација на конкретни мерки за почист воздух, односно 20 пати повеќе од досегашните средства на годишно ниво.