Karrama sojojin da suka shiga yakin Afghanistan

Shugabanin Jamus sun gudanar da wani muhinmin taro don karrama sojojin kasar da suka sadaukar da rayukansu a tsawon shekaru ashirin da rundunar sojin kasar ta kwashe a yakin kasar Afghanistan.

Shugabar gwamnati Angela Merkel da Shugaba Frank-Walter Steinmeier da sauran manyan jagororin gwamnati ne suka halarci taron na birnin Berlin a wannan Laraba. Sojojin Jamus kimanin 150, 000 aka tura Afghanistan a farkon shekarar 2002. Jamus ta rasa kimanin sojojinta 59 kafin ta sanar da janye rundunar bayan da Taliban ta kwace mulki a watan Augustan da ya gabata.