مانور نظامی روسیه و تاجیکستان در نزدیکی مرز افغانستان

سخنگوی وزارت دفاع تاجیکستان روز سه شنبه گفت که در این مانور نظامی 50 هزار سرباز تاجیک و دو هزار سرباز روسی اشتراک دارند. او افزود که سربازان پراشوتی نیز از روسیه به تاجیکستان آمده و در این مانور اشتراک کرده اند.

فریدن محمد علی زاده، سخنگوی وزارت دفاع تاجیکستان به فرانس پرس گفت: «این مانور شامل حدود یک هزار زره پوش، دستگاه‌های توپخانه و 23 طیاره جنگی و ترانسپورتی است.» او افزود که این تمرین‌ها تا آخر این هفته ادامه می‌یابد.

این نخستین باری است که سربازان نظامی منطقه مرکزی روسیه در تمرین‌های نظامی در تاجیکستان اشتراک می‌کنند. این نشان دهنده نگرانی فزاینده روسیه از گسترش خشونت‌ها از ولایت‌های شمالی افغانستان به آسیای مرکزی است.

سخنگوی وزارت دفاع تاجیکستان تایید کرد که سربازان دیگری که در این مانور اشتراک دارند از پایگاه نظامی 201 مسکو در تاجیکستان است.

سال گذشته واحدی متشکل از 2500 سرباز از سوی سازمان پیمان امنیت جمعی یک مانور نظامی را در تاجیکستان راه اندازی کرده بود. این بلاک نظامی مشتکل از کشورهای روسیه، ارمنستان، روسیه سفید، قزاقستان، قرغیزستان و تاجیکستان است.

ولایت‌های شمالی افغانستان در ماه‌های اخیر شاهد افزایش شورشگری بوده است. افزایش خشونت‌ها در این ولایت‌ها برای همسایه‌های شمالی افغانستان نیز نگران کننده است.

در امتداد مرز مشترک 1300 کیلومتری افغانستان و تاجیکستان به تکرار زد و خوردهایی صورت گرفته است. نیروی مرزی تاجیکستان در اوایل این ماه گفت که یکی از افسران‌اش و یک شورشی پس از آن کشته شدند که یک گروه مسلح از افغانستان وارد تاجیکستان شدند.