در عملیات تاجیکستان در نزدیکی مرز افغانستان ۹ تن کشته شدند

خبرگزاری دولتی ریا نووستی روسیه روز چهارشنبه به نقل از وزارت داخله تاجیکستان گزارش داد که این کشور یک "عملیات ضد تروریستی" را در ولایت ناآرام گورنو بدخشان که با افغانستان و چین هم مرز است، راه اندازی کرده است.

این خبرگزاری گفت که اعضای یک "گروه جنایتکار سازمان یافته" جاده ای را که تاجیکستان و چین را به یکدیگر متصل می‌کند مسدود کرده است تا "وضعیت اجتماعی و سیاسی" را در این جمهوری فقیر شوروی سابق که میزبان پایگاه نظامی روسیه است، "بی ثبات کند".

وزارت داخله تاجیکستان روز چهارشنبه گفت که نیروهای امنیتی هشت ستیزه جوی ضد دولتی که در جریان این عملیات علیه نیروهای دولتی کمین کرده بودند، کشته شدند. یک افسر نیز در درگیری در ولایت گورنو بدخشان که با افغانستان و چین هم مرز است، کشته شد.

این وزارت گفت گروه یاد شده با سلاح گرم و بمب های بنزینی به یک کاروان امنیتی حمله کردند. در این رویداد ۱۳ سرباز زخمی شدند. نیروهای امنیتی بیش از ۷۰ نفر را بازداشت کردند.

وزارت داخله تاجیکستان گفت که نظم در منطقه برقرار شده است؛ جایی که معترضان خواستار استعفای دولت محلی منصوب شده توسط رئیس جمهور امامعلی رحمان شده اند.

ده‌ها نفر در درگیری بین یک گروه مسلح داخلی و نیروهای دولتی در گورنو بدخشان در سال ۲۰۱۲ نیز کشته شدند.

یکی از نگرانی های دیگر تاجیکستان ترس از تحرکات گروه‌های تروریستی از افغانستان علیه این کشور است. پس از تسلط طالبان در افغانستان نگرانی‌های امنیتی در بیشتر کشورهای آسیای میانه به ویژه تاجیکستان که با افغانستان مرز مشترک دارند، بیشتر شده است.

اما طالبان وعده کرده اند که از خاک افغانستان در برابر کشورهای دیگر استفاده نخواهد شد.