تاجیکستان به انتقال ۸۰ زندانی افغان به افغانستان توافق کرد

 وزارت خارجه افغانستان امروز جمعه گفت که تاجیکستان توافق کرده است که ۸۰ شهروند افغان را که در آن کشور زندانی اند به  افغانستان انتقال دهد. در حال حاضر نزدیک به ۲۰۰ شهروند افغان به جرم قاچاق مواد مخدر در زندان های تاجیکستان زندانی هستند.

 سخنگوی وزارت امور خارجه می گوید که سرپرست وزارت خارجه افغانستان در دیدارش با رئیس جمهور تاجیکستان از وی خواسته است تا این زندانیان افغان را به افغانستان مسترد کند. رئیس جمهور تاجیکستان نیز اطمینان داده است که هشتاد زندانی افغان به افغانستان انتقال خواهند یافت.

صبغت الله احمدی، سخنگوی وزارت امور خارجه به دویچه وله گفت: «قراراست این زندانیان به زودی برگردانده شوند و مدت باقی مانده محکومیت شان را در افغانستان سپری کنند.»

بربنیاد آمار های وزارت امور خارجه افغانستان در حال حاضر بیش از ۲۰۰ شهروند افغان در تاجیکستان زندانی اند که دوسیه های ۱۷۴ تن آنان تکمیل شده است و کار روی پرونده های نزدیک به ۴۰ زندانی دیگر ادامه دارد، احمدی می گوید که پس ازانتقال این هشتاد زندانی درباره دیگر شهروندان افغان که در تاجیکستان زندانی اند با مقام های تاجیکستان گفتگو خواهد شد.

 پیش ازاین نیز شماری از زندانیان افغان از تاجیکستان به این کشور انتقال یافته اند. احمدی درباره این که این شهروندان افغان به چه جرمی در آن کشور زندانی شده اند؛ گفت: «مشخص یک جرم نیست. موارد زیادی است اما بیشتر این شهروندان به جرم قاچاق مواد مخدر و عبور غیرقانونی از مرز زندانی شده اند و باقی دوره محکومیت شان را در افغانستان سپری خواهند کرد.» .

 افغانستان و تاجیکستان در حدود ۱۳۰۰ کیلومتر مرز مشترک دارند. ولایت های بدخشان، تخار، کندز در شمال افغانستان با تاجیکستان هم مرز هستند. این مرز یکی از مسیر های قاچاق مواد مخدر از افغانستان به روسیه و کشور های غربی به شمار می رود.

وزارت امور خارجه می گوید که تاجیکستان برعلاوه استرداد زندانیان افغان وعده کرده است که کار بند برق راغون تا یک سال دیگر تکمیل و به بهره برداری بسپارد. افغانستان که یکی از وارد کنندگان اصلی برق تاجیکستان است احتمالا از برق این بند مستفید خواهد شد. بند راغون از پروژه‌های کلان اقتصادی تاجیکستان است که می تواند کمبود انرژی برق داخلی تاجیکستان را رفع کند.